Nilesh Rana, Banaskantha: બનાસકાંઠા જિલ્લામાં હવામાન ખાતાની આગાહીને અનુલક્ષીને તા.28 જાન્યઆરી 2023ના બનાસકાંઠા જિલ્લામાં કમોસમી વરસાદ, માવઠા તેમજ વાદળછાયા વાતાવરણની શક્યતા છે. આગાહીનાં પગલે ખેડૂતોમાં ચિંતા વ્યાપી ગઇ છે.

બનાસકાંઠા જિલ્લો એ મુખ્યત્વે ખેતી સાથે સંકળાયેલા જિલ્લો છે.ખેડૂતોએ મોટા પ્રમાણમાં રવિ સિઝનમાં મુખ્યત્વે જીરા,બટાટા,રાયડા,શાકભાજી જેવા પાકોની વાવણી કરી છે.અને હવામાન વિભાગે તા.28 જાન્યુઆરી 2023ના બનાસકાંઠા જિલ્લામાં કમોસમી વરસાદ,માવઠા તેમજ વાદળછાયા વાતાવરણની શક્યતા વ્યકત કરાઇ છે. જીરાના પાકમાં કમોસમી વારસાદ,માવઠા, વાદળછાયા અને ભેજવાળા હવામાન પ્રત્યે ખુબ જ સંવેદનશીલ હોય છે.જેમાં ચરમી (કાળીયો)ના રોગથી પ્રભાવિત થઈ શકે છે.

જીરૂ અને બટાટાનાં પાકને બચાવવા આટલું કરવું

જીરાના પાકને ચરમી રોગથી બચાવવા આવા સમયે પિયત અને ખાતર આપવાનુ ટાળવું જોઇએ તથા રોગની રાહ જોયા સિવાય મેન્કોઝેબ 75% વેટેબલ પાવડર 30 ગ્રામ તથા 25 મિલિ તેલીયા સાબુનું સંતૃપ્ત દ્રાવણ 10 લીટર પાણીમાં ભેળવીને છોડ પૂરેપૂરો ભીંજાય એ રીતે છંટકાવ કરવો.તેમજ વરસાદ પડ્યા બાદ છંટકાવ કરવો અતિ આવશ્યક છે.તેમજ બટાટા વાવતા ખેડૂતોએ પણ આ સમય દરમ્યાન પિયત આપવાનું ટાળી ભલામણ કરેલા દવા ક્લોરોથેલોનીલ 75% વે.પા. 27 ગ્રામ અથવા હેક્ઝાકોનાઝોલ 5% ઇસી 5 મિલિ 10 લિટર પાણીમાં મિક્ષ કરીને છંટકાવ કરવો. જેથી આગોતરા, પાછોતરા સુકારાના રોગથી બટાટાના પાકને બચાવી શકાય.

વરસાદ થાય તો આટલું કરવું

કમોસમી વરસાદથી થતા પાક નુકસાનીથી બચવા માટે ખેડૂતોના ખેડૂત ઉત્પાદિત પાક ખેતરમાં કાપણી કરેલ હોય તો તેને તાત્કાલિક સલામત સ્થળે ખસેડવાની કાર્યવાહી કરવી અથવા પ્લાસ્ટિક તાડપત્રીથી યોગ્ય રીતે ઢાંકી દેવું અને ઢગલાની ફરતે માટીનો પાળો બનાવી વરસાદનું પાણી ઢગલાની નીચે જતું અટકાવવું તેમજ જંતુનાશક દવા અને ખાતરનો ઉપયોગ આ સમયગાળા પૂરતો ટાળવો.ખાતર અને બિયારણના વિક્રેતાઓએ જથ્થો પલળે નહીં તે મુજબ ગોડાઉનમાં સુરક્ષિત રાખવા.

News18ગુજરાતી
વધુ સમાચાર…