Dahod Lok Sabha Elections Results 2024: ગુજરાતની દાહોદ લોકસભા બેઠક પર ભાજપના ઉમેદવાર જસવંતસિંહ ભાભોર આગળ ચાલી રહ્યા છે. ટ્રેન્ડ મુજબ ભાજપ અને કોંગ્રેસના ઉમેદવારો વચ્ચે મતનો તફાવત 137295 જેટલો છે. આ બેઠક અનુસૂચિત જનજાતિ માટે અનામત છે. આ સીટ પર ત્રીજા તબક્કામાં 7 મેના રોજ મતદાન થયું હતું. આ વખતે અહીં કુલ 58.66 ટકા મતદાન થયું હતું. આ બેઠક પર મુખ્ય મુકાબલો ભાજપ અને કોંગ્રેસ વચ્ચે હોવાનું માનવામાં આવે છે. ભાજપે ફરી નિવર્તમાન સાંસદ જસવંત સિંહ ભાભોરને ટિકિટ આપી છે.
તેવામાં કોંગ્રેસ પાર્ટીની ટિકિટ પર પ્રભા કિશોર તાવિયાડ તેમને રોકવા માટે મેદાનમાં છે. મધ્યપ્રદેશ અને રાજસ્થાનને અડીને આવેલા દાહોદ જિલ્લાનું નામ પહેલા દોહ હતું, જો કે પાછળથી આ નામ અપભ્રંશ થઈને જિલ્લાનું નામ દાહોદ થઈ ગયું.
રીંછના અભયારણ્ય માટે પ્રખ્યાત આ જિલ્લામાં એક સમયે કોંગ્રેસની મજબૂત પકડ હતી, પરંતુ હવે આ બેઠક પર ભાજપે પોતાનો ગઢ બનાવી લીધો છે. 2019ની લોકસભા ચૂંટણીમાં આ સીટ પર મુખ્ય મુકાબલો ભાજપ અને કોંગ્રેસ વચ્ચે હતો. જેમાં ભાજપના ઉમેદવાર અને સાંસદ જસવંતસિંહ સુમનભાઈ ભાભોર 5 લાખ 61 હજાર 760 મતો મેળવીને વિજયી થયા હતા. તેમને જોરદાર ટક્કર આપતા કોંગ્રેસના ઉમેદવાર બાબુભાઈ ખીમાભાઈ કટારા 1 લાખ 27 હજાર મતોની સરસાઈથી ચૂંટણી હારી ગયા હતા. તેમને આ ચૂંટણીમાં કુલ 4 લાખ 34 હજાર વોટ મળ્યા હતા.
2014માં ભાજપને મોટી જીત મળી
2014ની ચૂંટણીમાં આ સીટ પર ભાજપને મોટી જીત મળી હતી. ત્યારે ભાજપની ટિકિટ પર પ્રથમવાર ચૂંટણી લડનાર જસવંતસિંહ સુમનભાઈ ભાભોરને કુલ 5 લાખ 11 હજાર મત મળ્યા હતા. તેમણે કોંગ્રેસના ઉમેદવાર અને નિવર્તમાન સાંસદ ડો. પ્રભાબેન કિશોરસિંહ તાવિયાડને 2 લાખ 30 હજાર મતોની સરસાઈથી હરાવ્યા હતા. આ ચૂંટણીમાં પ્રભાબેનને કુલ 2 લાખ 80 હજાર મત મળ્યા હતા. આઝાદી સાથે અસ્તિત્વમાં આવેલી આ લોકસભા બેઠક માટે પ્રથમ ચૂંટણી વર્ષ 1952માં યોજાઈ હતી. ત્યારે કોંગ્રેસ પક્ષના જલજીભાઈ કોયાભાઈ ડીંડોડ સાંસદ તરીકે ચૂંટાયા હતા. ત્યાર બાદ આ બેઠક પર સ્વતંત્ર પક્ષના ઉમેદવારો સતત બે વખત જીત્યા હતા.
1967માં કોંગ્રેસ પાર્ટીને આ સીટ ફરી મળી અને 1998 સુધી આ સીટ પર કોંગ્રેસનો દબદબો રહ્યો. જોકે, 1999 અને 2004ની ચૂંટણીમાં આ બેઠક પરથી ભાજપના બાબુભાઈ ખીમાભાઈ કટારા સાંસદ તરીકે ચૂંટાયા હતા. આ પછી વર્ષ 2009માં ફરી એકવાર કોંગ્રેસ પાર્ટીના ડો.પ્રભા કિશોર તાવિયાડ આ બેઠક પર જીત્યા હતા. જે બાદ 2014 અને 2019માં યોજાયેલી ચૂંટણીમાં ભાજપના ઉમેદવાર જસવંતસિંહ સુમનભાઈ ભાભોર સાંસદ તરીકે ચૂંટાયા છે.
ગુજરાત લોકસભા ચૂંટણી પરિણામ 2024
ભાજપના સૌથી મજબૂત રાજ્યોમાંથી એક ગુજરાત છે. આ રાજ્યમાં સત્તારૂઢ પાર્ટી હંમેશા લોકસભા ચૂંટણીમાં એકતરફી જીતે છે. ભાજપ વડાપ્રધાન નરેન્દ્ર મોદી અને કેન્દ્રીય ગૃહ પ્રધાન અમિત શાહના ગૃહ રાજ્યમાં 2014 અને 2019ની જીતનું પુનરાવર્તન કરવા માંગે છે. કોંગ્રેસ અને આમ આદમી પાર્ટી આ વખતે ગુજરાતમાં I.N.D.I ગઠબંધન હેઠળ ચૂંટણી લડી રહી છે. કોંગ્રેસ 24 સીટો પર ચૂંટણી લડી રહી છે જ્યારે AAP 2 સીટો પર ચૂંટણી લડી રહી છે.
લોકસભા ચૂંટણીના ત્રીજા તબક્કામાં 7 મેના રોજ ગુજરાતના 25 સંસદીય મતવિસ્તારોમાં મતદાન થયું હતું, જેમાં 55%થી વધુ મતદાન થયું હતું. ત્રણ કેબિનેટ મંત્રી અમિત શાહ, મનસુખ માંડવિયા અને પુરુષોત્તમ રૂપાલા અને એક રાજ્ય મંત્રી દેવુસિંહ ચૌહાણ સહિત કુલ 265 ઉમેદવારો મેદાનમાં છે.
ગુજરાતની તમામ 25 બેઠકો પર 7 મેના રોજ કુલ 60.13 ટકા મતદાન થયું હતું. સૌથી વધુ મતદાન સંસદીય ક્ષેત્ર વલસાડ (72.71 ટકા)માં થયું હતું. તે જ સમયે, સૌથી ઓછું મતદાન અમરેલીમાં (50.29 ટકા) થયું હતું. મોટાભાગના એક્ઝિટ પોલ અનુસાર ગુજરાતમાં ભાજપને 25-26 બેઠકો મળવાનું અનુમાન છે. તે જ સમયે, કોંગ્રેસ અને AAPને માત્ર 0-1 બેઠક મળી શકે છે. ગુજરાતમાં લોકસભાની 26 બેઠકો છે, જેમાંથી સુરત બેઠક પર ભાજપનું કમળ ખીલી ચૂક્યું છે. આ બેઠક પરથી ભાજપના ઉમેદવાર મુકેશ દલાલ બિનહરીફ જીત્યા છે. બાકીની 25 બેઠકો પર મતદાન થયું હતું, જેનું પરિણામ આજે જાહેર થશે.
ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર
