ગાંધીનગર: ગુજરાત રાજ્યના નાણામંત્રી કનુભાઈ દેસાઈએ 2025-26ના બજેટ માટે તૈયારી શરૂ કરી દીધી છે. આજે સવારે 9 વાગ્યાથી રાત્રે 9 વાગ્યા સુધી સાત વિવિધ વિભાગોના મંત્રીઓ અને અધિકારીઓ સાથે મેરેથોન બેઠક યોજાઈ છે. આ બેઠકમાં ગત વર્ષના બજેટના વહીવટ અને ખર્ચનું મૂલ્યાંકન કરવામાં આવ્યું અને આગામી બજેટ માટેના પ્રાથમિક લક્ષ્યો અને યોજનાઓની ચર્ચા થઈ.
ગત બજેટનું મૂલ્યાંકન અને સફળતાઓ
વર્ષ 2024-25ના બજેટમાં રાજ્યના વિકાસ માટે ₹3.32 લાખ કરોડ ફાળવવામાં આવ્યા હતા, જેમાં મહિલાઓ અને બાળકોના કલ્યાણ માટે ખાસ ફોકસ મૂકાયો હતો. “નમોશ્રી યોજના”, જે સગર્ભા અને ધાત્રી માતાઓના પોષણ માટે છે, તેને મોટી જાહેરાત તરીકે રજૂ કરવામાં આવી હતી. આ યોજના માટે ₹750 કરોડની ફાળવણી કરવામાં આવી હતી. શિક્ષણ ક્ષેત્રે પણ કિશોરીઓ માટે નવા પ્રોજેક્ટ શરૂ કરવામાં આવ્યા, જે રાજ્યના માનવસંપત્તિના વિકાસ માટે મહત્વના સાબિત થશે.
આ પણ વાંચો:
અમદાવાદ શોપિંગ ફેસ્ટિવલમાં ગ્રાહકોએ મન મુકીને ખરીદી કરી, માત્ર ઓક્ટોબરની આવક 69 હજાર કરોડ
શહેરી વિકાસ અને સ્થાનિક સ્વરાજ્ય ચૂંટણી
ગત બજેટમાં રાજ્યની આઠ નગરપાલિકાઓને મહાનગરપાલિકા તરીકે વિકસાવવાની જાહેરાત કરવામાં આવી હતી, જેમાં નવસારી, મોરબી, મહેસાણા, આણંદ અને સુરેન્દ્રનગરનો સમાવેશ થાય છે. આ મહાનગરપાલિકાઓના વિકાસ માટે વિશેષ ફાળવણી કરવામાં આવશે. આગામી 2025માં સ્થાનિક સ્વરાજ્યની ચૂંટણીઓ હોવાથી, આ બજેટમાં નગરપાલિકાઓ અને મહાનગરપાલિકાઓના વિકાસ માટે ફંડની વધારાની જોગવાઈ કરવાની શક્યતા છે.
આવનારા બજેટ માટેના લક્ષ્યો
આ મેરેથોન બેઠકમાં રાજ્યના નાણામંત્રીએ મુખ્ય પ્રાથમિકતાઓ પર ભાર મૂક્યો છે, જેમાં મહિલાઓના સશક્તિકરણ માટે નવી યોજનાઓ, કૃષિ વિકાસ, શહેરી વિસ્તારોમાં સ્માર્ટ સિટીઓ માટે ખર્ચ અને કોવિડ પછીના આરોગ્ય સેવાઓના દ્રષ્ટિકોણને આગળ વધારવાનું લક્ષ્ય છે. નાણામંત્રી કનુભાઈ દેસાઈની અધ્યક્ષતામાં આ બેઠકમાં વહીવટતંત્રએ વિવિધ વિભાગો માટેના ખર્ચનું મૂલ્યાંકન કર્યું, જેમાં યોજનાઓના અમલીકરણમાં કાર્યક્ષમતા લાવવા માટેના માર્ગો પર ચર્ચા થઈ.
આ પણ વાંચો:
મોજ પડી જશે: પાર્ટીપ્લોટ અને હોલ છોડો અમદાવાદમાં હવે વાવમાં પણ થઈ શકશે લગ્ન
ગુજરાતના વિકાસ માટે નવી યોજના
2025-26ના બજેટ માટે ખેડૂતો માટે ખાસ પેકેજની સંભાવના છે, જેમાં નવા ટેકનોલોજી આધારિત કૃષિ મશીનરી માટે સબસિડી તેમજ પાણી અને વીજળી માટેના ખર્ચમાં રાહતની જાહેરાત થઈ શકે છે.
ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર
