વેફરે નયનાબેનને બનાવ્યા આત્મનિર્ભર, ઘરે બેઠા 6થી 8 હજારની થાય છે કમાણી – Kumbhariya village women nayanaben madalka gain self reliance by selling wafers hc

લોકલ 18 સાથે વાત કરતા કુંભારિયા ગામના નયનાબેન માંડળકાએ જણાવ્યું કે, “હું એક ગૃહિણી છું. મેં ઘરે રહીને વેફર બનાવી તેનું વેચાણ કરવાની શરૂઆત કરી છે. હું કેળા-બટાકાની અલગ અલગ પ્રકારની વેફર બનાવું છું. મેં બનાવેલી વેફરનું વેચાણ રાજુલા, જાફરાબાદ, ખાંભા તેમજ અમરેલી જિલ્લામાં અને અમદાવાદ સુધી વેચાણ કરવામાં આવે છે. 250 રૂપિયા પ્રતિ કિલોનો વેફરનો ભાવ મળી રહે છે. જેથી મહિને અંદાજિત 25 થી 30 કિલો વેફરનું વેચાણ થાય છે અને 6 થી 8000 રૂપિયા સુધીની આવક મળી રહી છે.”

ઘરે બેઠા 3000થી 5000 રૂપિયાની આવક

નયનાબેને વધુમાં જણાવ્યું કે, “ગામની અંદર દરેક મહિલાઓએ એક જૂથ બનાવ્યું છે. આ જૂથ બનાવ્યા બાદ એક મહિલાના નિવાસસ્થાને વેફર બનાવવાનું કામ કરવામાં આવે છે. તો અન્ય વ્યક્તિઓના નિવાસસ્થાને પાપડ, ખાખરા તેમજ અલગ અલગ વેરાયટી બનાવવામાં આવે છે. જેનું વેચાણ કરવામાં આવે છે. ગામની દરેક મહિલાને ઘરે બેઠા અંદાજિત 3,000 થી 5000 રૂપિયાની મહિને આવક થઈ રહી છે.”

ઉલ્લેખનીય છે કે, આ ગામની મોટાભાગની મહિલાઓ જુદા જુદા મંડળો ચલાવી રહી છે અને મંડળમાં વિવિધ વાનગીઓ, મીઠાઈ, અથાણા અને મુખવાસ બનાવે છે, જેનું વેચાણ પણ કરવામાં આવે છે. ગુજરાતના વિવિધ વિસ્તારોમાં જાહેર સ્ટોલમાં પણ વેચાણ કરવામાં આવે છે અને સારી આવક મળે છે. તેમની ચોકસાઈ, ગુણવત્તા અને મીઠાઈના કારણે લોકો આ વસ્તુઓ ખરીદે છે.