જામનગર જિલ્લામાં હોળી અને ધુળેટી દરમિયાન કાયદો વ્યવસ્થા જળવાઈ રહે અને ભાઈચારાથી પર્વની ઉજવણી થાય તે માટે અધિક જિલ્લા મેજિસ્ટ્રેટ બી.એન.ખેર દ્વારા જાહેરનામું બહાર પાડવામાં આવ્યું છે. જેમાં કોઈપણ અનિચ્છનિય બનાવ ન બને તેની તકેદારી રાખવા સૂચવવામાં આવ્યું છે. જાહેરનામામાં સત્તાવાર રીતે જાહેર કરાયેલ વિગત અનુસાર કોઈપણ વ્યક્તિની ઈચ્છા વિરુદ્ધ તેના પર રંગ છાંટવો નહીં. જો તેની ઈચ્છા ન હોય તો કોઈ પણ વ્યક્તિ પર કલર ઉડાડી શકાતો નથી. તેમજ કોઈ વ્યક્તિ, કે સંપ્રદાયની લાગણી દુભાય તેવા શબ્દો અથવા સૂત્રો પોકારવા કે બોલવા નહીં, વધુમાં વિવાદાસ્પદ પત્રિકા, પ્લે કાર્ડ અથવા વિચિત્ર આકૃતિઓ કે વસ્તુઓ ના બનાવવા પણ જણાવ્યું છે.

જામનગર જિલ્લામાં આવી તમામ પ્રવૃત્તિઓ કરવા પર સત્તાવાર રીતે મનાઈ ફરમાવી દેવામાં આવી છે. જામનગર શહેર અને જિલ્લાભરમાં આ જાહેરનામું તા.12-3-2025ના સાંજે 6:00 કલાકથી આગામી તા.14-3-2025ના 24:00 કલાક સુધી અમલમાં રહેશે. જેનો લોકોએ ચુસ્તપણે અમલ કરવા તાકીદ કરાઈ છે.

આ પણ વાંચો: તલવાર, હથોડી, કુહાડી, ત્રિશુલ પિચકારીની ધૂમ ખરીદી, 80 લાખ રૂપિયાનું ટર્નઓવર

એટલું જ નહીં મનાઈ હોવા છતાં પ્રતિબંધિત વસ્તુઓ કરવા પર જાહેરનામાના ભંગ હેઠળ ગુનો નોંધાઈ શકે છે અને આમ કરવા પર ગુજરાત પોલીસ અધિનિયમ 1951ની કલમ 135(1) હેઠળ કાયદેસરની કાર્યવાહી થાય છે. જેમાં ઓછામાં ઓછા 4 મહિનાની અને વધુમાં વધુ 1 વર્ષની કેદની સજા થઈ શકે છે.