કમોસમી વરસાદનો પ્રકોપ: ભર ઉનાળે ગુજરાતના માથે સંકટ, પોરબંદરમાં 2 કલાકમાં 4 ઈંચ વરસાદ-Outbreak of unseasonal rains Gujarat in trouble throughout the summer 4 inches of rain in 2 hours in Porbandar

આ સિવાય ધોરાજીમાં સતત ચોથા દિવસે કમોસમી વરસાદ વરસ્યો છે. શહેરમાં ભારે પવન સાથે કમોસમી વરસાદ વરસ્યો છે. ધોધમાર વરસાદને કારણે અહીંયા ઘણા બધા વિસ્તારોમાં પાણી ભરાઈ ગયા હતા. ચોમાસાના આગમન પહેલા જ કમોસમી વરસાદે નગરપાલિકાની પોલ ખોલી કાઢી હતી. અહીંયા શાક માર્કેટ રોડ, સાજી હોલ, ગેલેકસી ચોક, ચકલા ચોક સહિતના વિસ્તારોમાં પાણી ભરાઈ ગયા હતા.

અમરેલીના વડીયા સહિત આસપાસના ગ્રામ્ય વિસ્તારમાં પણ વાતાવરણમાં પલટો આવ્યો હતો. જેમાં કાળા ડિબાંગ વાદળો અને પવન સાથે જોરદાર વરસાદ પડ્યો. જેમાં વડીયા, મોરવાડા, બરવાળા, બાવળા, હનુમાનખીજડિયા, સાથરી સહિતના ગામોમાં કમોસમી વરસાદ પડ્યો હતો. આ કમોસમી વરસાદને કારણે ગરમીથી કંટાળેલા લોકોને આશિંક રાહત મળી હતી. જોકે અહીંયાના ખેડૂતોમાં પણ હાલ ચિંતાનો માહોલ છવાઈ ગયો છે.

રાજકોટમાં પણ સતત પાંચમાં દિવસે કમોસમી વરસાદનો આતંક જોવા મળ્યો હતો. જેમાં ગ્રામ્ય પંથકમાં કમોસમી વરસાદે માજા મૂકી હતી. જેમાં શાપર વેરાવળ ખાતે ભારે પવન સાથે વરસાદી ઝાપટું પડ્યું હતું. આ સિવાય રાજકોટ શહેરમાં પણ ઘણા બધા વિસ્તારોમાં કમોસમી વરસાદ પડ્યો હતો. જેના કારણે ગરમીથી કંટાળેલા લોકોએ રાહત અનુભવી હતી.

ઉલ્લેખનીય છે કે જેતપુર શહેર અને ગ્રામ્ય વિસ્તારમાં પણ ધોધમાર કમોસમી વરસાદ પડ્યો હતો. જેમાં શહેર અને તાલુકાના ગ્રામ્ય વિસ્તારમાં ભારે પવન સાથે વરસાદ પડ્યો હતો. તાલુકાના વિરપુર, કાગવડ, પીઠડિયા, મંડલીકપુર સહિત અનેક ગામોમાં વરસાદ પડ્યો હતો. જેમાં સતત પડી રહેલા વરસાદને કારણે ખેડૂતોના મગફળી, તલ અને મગ સહિતના પાક નિષ્ફળ ગયા હતા.